Welcome to Urelu

urelu2
மாவீரன் தியாகி திலீபனைப் பெற்றெடுத்த பெருமையைப் பாரெங்கும் பறைசாற்றி நிற்கும் பசுமையான ஊராம் ஊரெழு. அழகையும், அற்புதங்களையும், பழமையையும், பெருமையும், வளங்களையும் வனப்புகளையும் அன்பையும் பண்பையும் தன்னகத்தே கொண்டிருப்பினும், தியாகி திலீபனைப் பெற்றமையால், ஊரெழுக்கிராமம் தமிழீழ வரலாற்றில் தனித்தன்மையையும் தனியோர் இடத்தையும்; பெற்றுள்ளது என்றால் மிகையாகாது.

ஊர் அமைவிடம்

யாழ் நகரத்திலிருந்து 6 கி.மீ. தொலைவில் அமைந்துள்ள ஊரெழுக் கிராமத்தைப் பலாலி வீதி ஊடறுத்துச் செல்கின்றது. இவ்வீதி ஊரெழுவைக் கிழக்கு, மேற்கு என இருபெரும் பிரிவுகளாகப் பிரித்து நிற்கின்றது. வடக்கெல்லையில் சாவகச்சேரி-சங்கானை வீதியையும், மத்தியில் கிழக்கு-மேற்காக இராஜ வீதியையும் சுன்னாகத்தையும் இணைக்கும் ஒரு வீதியும் அமைந்துள்ளன. ஏறத்தாழ 4 சதுரமைல் நிலப்பரப்பைக் கொண்ட இப்பிரதேசத்தில் 3074 மக்கள் அதாவது 824 குடும்பங்கள் தற்பொழுது வசிக்கின்றனர். பண்பட்ட செந்நிலமும் வற்றாத நீரூற்றும் என்றும் மக்களுக்கு மன அமைதியைத் தரும் பெரும்வளங்களாக இயற்கை வாரி வழங்கியுள்ளது.

MAP Of URELU

 


The Purpose of this Web site is to

  • Bring all of our Urelu friends, relatives and the whole community who scattered all around the World for decades to bring under one roof called Urelu.com.
  • Maintain the cultural and religious heritage and pass it on to the younger generation here by conducting and promoting cultural activities.
  • Identify and fulfill the basic needs of our village by providing assistance to improve the life standard of our community.

பெயர் பெறக் காரணம்

இத்தகைய சிறப்பிற்குரிய சிற்றூர் வலிகாமம் கிழக்கில் மேற்கோர் மத்தியில் அமைந்துள்ளது. “ஊரெழு” என நாம் உணர்வுடன் உள்ளத்திலிருந்து உச்சரிக்கும் இப்பெயர்; அமைந்ததற்கான காரணத்தை வரையறுத்துஉறுதியாகக் கூறமுடியாவிட்டாலும், ஊர் மக்களால் வாய்மொழியாக வழங்கி வரும் காரணங்கள் சிலவற்றைக் கூறலாம். வாய்மொழியாக வழங்கி வருவதால், அவற்றை வெறும் கதைகள் என்;று ஒதுக்கிவிட முடியாது. ஏனென்றால், அவை ஏற்றுக்கொள்ளக் கூடிய கதைகளாகவும், காரணங்களுமாக உள்ளன.

1. பல பெருமைகளை அணிகளாகக் கொண்ட இவ்வூரானது தனைச்சூழ ஏழு ஊர்களை அரண்களாகக் கொண்டு ஊரெழு எனப்பெயர் பெற்றுள்ளது. (ஊர்ூஏழு ஸ்ரீஊரேழு மருவி ஊரெழுவானது என்பர்.) கிழக்கில் நீர்வேலியும் தென்பகுதியில் உரும்பிராயும், மருதனார்மடமும் மேற்கோரமாகச் சுன்னாகம், வடக்கே ஏழாலை, புன்னாலைக்கட்டுவன் வட கிழக்கில் அச்செழுவும் ஊரெழுவுடன் உறவாடி நிற்கின்றன.

2. முன்னொரு காலத்தில் ஊர்களில் ஏற்பட்ட இயற்கை அழிவுகளால், வேற்றூர் மக்கள் இடம் பெயர்ந்து வந்து இவ்வூர்pல் தங்கினராம். ஊர் எழுந்து வந்தமையால் ஊரெழு என அழைக்கப்பட்டது எனவும்; கூறுவர்.

3. எப்பொழுதுமே இவ்வூர் எழுச்சியுள்ள ஊராக விளங்கியதால் ஊரெழு என மருவியதாகவும் கூறுவோர் உளர்.

4. எங்கு என்ன சிக்கல்கள் தோன்றினாலும், அவற்றை இவ்வூரே எழுந்து வந்து முன்னின்று அச்சிக்கல்களைமுகங்கொடுத்துத் தீர்த்து வைப்பதனால், ஊரெழு எனப் பெயர் வந்தது எனக் கூறுவோரும் உளர்.

எவை எப்படியிருப்பினும் மேற்கூறப்பட்ட ஒவ்வொரு காரணங்களும் இன்று ஊரெழு என்ற பெயருடன் பொருந்தி வருவதால், உண்மைகள் போலவே காட்சியளிக்கின்றன.


பொக்கணை:

pokkanai

ஊரெழுவில்அதிசயமும், அற்புதமுமாக விளங்குவது பொக்கணை

எனும் வற்றா நீரூற்றாகும். இதை “யாமா”
என்றும் அழைப்பர். இந்நீரூற்றுக்குப் பல வகையான விளக்கங்களைப் பலரும் வழங்குவர். இவ்விடத்தில் பல ஆண்டுகளுக்கு முன்னால், இடி விழுந்திருக்கலாம் என்றும் அதனால் ஏற்பட்ட குன்றே இவ்வடியில்லா வற்றா நீரூற்றாக இருக்கலாம் என அறிவியலாளர்; விளக்குகின்றனர்.

ஊரெழு பழம்பெரும் கிராமம் என்பதற்குச் சான்றாகக் கர்ணபரம்பரைக் கதையோடு தொடர்புபடுத்திப் பொக்கணை ஊற்றுக்கு விளக்கம் கூறுவோரும் உளர். இராமர் சீதையைத் தேடிப் படைகளுடன் இலங்கைக்கு வந்திருந்த போது, தண்ணீர்த் தாகம் எடுத்தமையால், இராமர் தனது அம்பிபைப் பூமிமேல் எய்து நீர் ஊற்றை உருவாக்கித் தமது தண்ணீர்த் தாகத்தினைத் தணித்த இடமே இன்னும் வற்றா ஊற்றாக விளங்கும் “பொக்கணை யாமா” என்பது வாய்;மொழியாகக் கூறப்பட்டு வரும் கதையாகும். இந்நீர் ஊற்றுக்கு அருகில் இருக்கும் கற்பாறை ஒன்றில் முழங்கால் அடையாளம் போன்று குழிகள் இருப்பது மேலும் இக்கதைக்கும் இம்மக்களின் நம்பிக்கைக்கும் வலுச்சேர்ப்பதாய் அமைந்துள்ளது. இஃது ஆய்வுக்குரிய ஒன்றே.

இப்பொக்கணை ஊற்றானது, நீரைத் தேக்கி ஊருக்கு நீர்ப்பஞ்சம் போக்க உதவுவது மட்டுமன்றி மாரிகாலத்தில், காட்டாற்று வெள்ளம்போல் கிராம வீதிகளை நிறைத்துப் பாய்ந்து வரும் வெள்ளப் பெருக்கினை நிலத்துக்குக் கீழ் உள்ள இயற்கைக் கால்வாய்களினால் மேலதிக நீரைக் கடலுக்குக் கொண்டு சேர்க்கவும் வல்லது. மாரிகாலத்தில் இப்பகுதி பெரியதோர் குளம்போன்று காட்சியளிக்கும். ஊரெழுக் கிராமத்திற்கு இயற்கை தந்த உன்னத வடிகால் பொக்கணை ஊற்றாகும். இதே போன்றோர் ஊற்று நவக்கிரியில் உள்ள நிலாவரையிலும் உள்ளது. இவ்விரு குன்றுக்கும் இடையேயான நீரோட்டம் இணைந்திருப்பதாகக் கருதுவர்.

பாராளுமன்ற உறுப்பினர்களான கோப்பாய்க் கோமான், அமர் வன்னியசிங்கம் ஆகியோரின் பெரும் முயற்சியால் இலங்கையின் முதலாவது பிரதமர் டி.எஸ்.சேனநாயக்கா அவர்களால் பொக்கணைக் குன்றினைப் பார்வையிட்டனர். நீர்ப்பாசன இலாகா பாரிய நீரிறைக்கும் இயந்திரங்களால் வற்ற நீரிறைக்க எடுத்த முயற்சிகள் தோல்வி கண்டன. இதன் பயனாக நீரிறைக்கும் காற்றாடி இயந்திரம் நிறுவியதோடு மேட்டு நிலத்தில் நீர்த்தேக்கம் ஒன்றும் கட்டப்பட்டது. நீரைச் சேகரித்து வாய்க்கால் மூலம் பயிர் செய்நிலங்களுக்கு நீர்ப்பாசன வசதி செய்யப்பட்டிருந்தது. இன்றும் இந்நீரூற்றிற்கு அருகிலுள்ள வயல் நிலங்களும் பாரிய நீர் சேகரிக்கும் தொட்டியும் அதனூடாக நீர் செல்லும் சீமெந்து வாய்க்காற் கட்டுகளும் ஆதாரம் தருகின்றன. பல ஆண்டுகளாகப் பாழடைந்த நிலையிலுள்ள நீரூற்றினைத் தற்பொழுது அரசாங்கம் புனரமைத்து வருவது மகிழ்ச்சிக்குரிய ஒன்றாகும். புனரமைப்பு வேலைகள் முடிந்ததும் குடி நீர் இல்லா இடங்களுக்கு இந்நீரினை விநியோகம் செய்யவும் இடத்தினைப் புனிதமாக வைத்திருக்கவும் நடவடிக்கை மேற்கொண்டு வருவது வரவேற்புக்குரிய செயலாகும்.

இப்பொக்கணை அமைந்துள்ள நிலம் பலவகையான மண் அமைப்பினையும் கற்பாறைகளையும் கொண்டுள்ளது. அத்துடன் மந்தைகள் மேய்வதற்கேற்ற புற்றரைகளும் நீரருந்திக் காலாற ஆவுரோஞ்சிக் கற்களுடன்கூடிய கட்டுக் கேணியும் ஆங்குண்டு. மாரிகாலத்தில் இப்பொழுதும் நீர் தேங்கி நிற்கும். கோடையில் நீர் வற்றினாலும் அவ்விடத்து மண்ணை வெட்டினால் நீர் ஊறிவருவதைக் காணலாம். இக்குளத்தினை ஆழமாக்கி நீரினைத் தேக்கினால் பல நன்மைகளை அடையலாம். இது போன்று ஊரெழுக்கிழக்கில்; கட்டுக்கேணிகள் முன் இரண்டு இருந்தன. அவை இப்பொழுது பிற தேவைகளின் நிமித்தம் மூடப்பட்டுள்ளன. கமத்தொழில் விருத்தியில் கரிசனை கொண்ட மூதாதையர் பட்டை கட்டித் துலா மிதித்து நீர் பாய்ச்சிப் பயிர்களை வளர்த்தெடுத்தனர். சூத்திரக் கிணறுகளை நிறுவி எருது பூட்டி நீர்பாய்ச்சியதும் உண்டு.

இப்பிரதேசத்திற்கு மேற்கில் நெற்பயிர் வளரக்கூடிய வயல் நிலங்களும் உண்டு. 50 வீடுகளைக் கொண்ட குடியேற்றம் அமைந்துள்ள மணற்றிடல் முன்னர் அழகான திடலாக விளங்கியது. இத்திடல் ஆராய்ச்சி செய்யாமல் விடுபட்டது கவலைக்குரியதே. இத்திடலில் தொல்பொருட்கள் இருப்பதற்குரிய வாய்ப்புகள் உள்ளதெனக் கருதப்படுகிறது.


விவசாயம்:

farm1

 

"உழுதுண்டு வாழ்வாரே வாழ்வார்மற் றெல்லாந்
 தொழுதுண்டு பின்செல் பவர்."
 (குறள்:1033)

என்ற வள்ளுவரின் வாக்குக்கமைய இங்கு வாழும் பெரும் தொகையான மக்கள் உழவுத் தொழிலையே முதற்கண் தொழிலாகக் கொண்டு வருபவர்கள். ஊரெழுக் கிராமத்தில், நீர் வளம் மட்டுமல்ல நிலவளமும் அவ்வூர் மக்களுக்கு இயற்கையாக அமைந்த ஒன்றாகும். ஊரெழுச் செம்மண் அவ்வூர் மக்களுக்குச் செம்மையான வாழ்வைச் செவ்வனச் செய்வதற்கேற்ப அமைந்துள்ளது. இங்கு வாழும் மக்கள் தம் நிலத்தைப் “பொன் விளையும் பூமி” என அடையாகக் கூறுவர். எத்தகைய பயிரைச் செய்தாலும் ஊரெழு மண்ணில் அப்பயிர்கள் செழிப்புடன் விளைவதும், வளர்வதும் அவ்வூர் மண்ணின் சிறப்புத் தன்மையாகும். மிகச் சிறந்த முறையில் நுட்பமாக விவசாயம் செய்வது அவ்வூர் மக்களின் ஆழ்ந்த அனுபவத்தையும் ஆற்றலையும் எடுத்துக் காட்டுகிறது. ஒவ்வொரு பயிரும் விளையும் காலங்களையும் அவற்றின் ஒவ்வொரு பருவங்களையும் அவற்றின் தட்பநுட்பங்களையும் நன்கறிந்து அவற்றிற்கேற்ப பயிர்ச்செய்யும்; முறைகள் அவ்வூர் மக்களின் அனுபவக் கல்வியே.
உருளைக்கிழங்கு, புகையிலை, வெங்காயம், வாழை, கோவா, வெற்றிலை, பீற்றுட், மரவள்ளி, கறணை, கத்தரி, முந்திரிகை, லீக்ஸ், மிளகாய், கரட், இராசவள்ளி, பயிற்றை போன்ற பயிர்கள் இம்மண்ணில் செழிப்பாக வளர்வன. இத்தகைய பயிர்கள் பெருமளவில் பயிரிடப்பட்டு, ஏற்றுமதி செய்யப்படுவன.ஊரெழுக்கிராமத்தில் உற்பத்தி செய்யப்பட்ட பொருட்கள் சுன்னாகப் பெரும் அங்காடியிலும், மருதனார்மடம், திருநெல்வேலி ஆகிய சிறு அங்காடிகளிலும் சந்தைப்படுத்தப்படும். ஆரம்பகாலங்களில் மிதியுந்துகளிலும் மற்றும் மாட்டுவண்டிகளிலும் தமது விளைபொருட்களை அங்காடிகளுக்கு எடுத்துச் சென்றனர்.

thottam

இயந்திர வாகனங்கள் வந்த பின்னர், இருசக்கர உழவியந்திரத்தில்(லான் மாஸ்ரர்) கொண்டு சென்றனர். விவசாயம் நன்றாக விரிவாக்கம் செய்யப்பட்ட காலங்களில் உருளைக்கிழங்கு, முந்திரிகை, வெங்காயம், மிளகாய் ஆகியன பெரும்தொகையாக லாறிகள்; மூலம் கொழும்புக்கு ஏற்றுமதி செய்யப்பட்டன
விவசாயத்தை முதலாகக் கொண்டிருப்பினும் கைத்தொழில்களும் இடம்பெறுகின்றன. அரிசி ஆலை, கல்லுடைக்கும் ஆலை, சுருட்டுக் கொட்டகை என்பன தனியார்வசம் இருக்கின்றன. பீடிப் புகையிலை செப்பனிடும் மையம் வீட்டுத் தளபாட உற்பத்தித் தொழிலகம் என்பவற்றுடன்குடிசைக் கைத்தொழில்களான நெசவு, மனைப்பொருளியல் பணிகள், தையல், கால்நடை வளர்ப்பு என்பனவும் மாதரின் பிரிய விருத்திச் செயற்பாடுகளாக இடம்பெறுகின்றன.

கோவில்கள்:

இத்தகைய பெரும் இயற்கை வளங்களையும் சிறப்புகளையும் கொண்ட ஊரெழுக்கிராமத்தில், பெரும் சக்திமிக்கத் தெய்வங்களும் விரும்பிக் குடிகொண்டு மக்களுக்கு அருள்பாலித்து வருகின்றன. பலாலி வீதியில் வீரகத்தி வினாயகர் கோவிலும், பர்வதபத்தினி அம்மன் கோவிலும், மேற்குப்பக்கமாகக் கண்ணகி அம்மன் கோவிலும், உரும்பிராய்-ஊரெழு எல்லையுடன் காட்டு வைரவர் கோவிலும் ஊரெழுக்கிழக்கிற் கேணியடி வைரவர் கோவிலும் பழமைமிக்கப் பெருமைமிக்கத் தலங்களாகும். இவற்றுள் காட்டு வைரவர் கோவில், கண்ணகி அம்மன் கோவில் மற்றும் பர்வதபத்தினி அம்மன் கோவில் ஆகியன வரலாற்றுச் சிறப்புமிக்க கோவில்களாகும்.

காட்டு வைரவர் கோயில் பல ஆண்டுகளுக்குமுன்னர்பல் ஆயிரக்கணக்கான மக்கள் திரண்டு பெருமளவில் வேள்விகள் நடைபெற்ற கோவிலாகும். இவ்வேள்விக்கு வேற்றூர் மக்கள் அணியணியாகத் திரண்டு வந்து கலந்து கொள்ளும் திருவிழாவாக இடம்பெறுவது வழக்கம்.

கண்ணகி அம்மன் கோவிலும் சிறப்புமிக்கஆலயமாகும். திருவிழாக்காலத்தில் பெருளமளவில் மக்கள் திரண்டு தீக்குளிக்கும் வைபவம் இடம்பெறும்.தீக்குளித்துத் தமது நேர்த்திக்கடன்களை
நிறைவுசெய்யும் காட்சி அம்மக்களின் ஆழமான இறை நம்பிக்கையைக் காட்டும் காட்சியாக இருக்கும்.

பர்வதபத்தினி அம்மன் கோவிலில் ஆடிப்பூரத்திலன்று குளுத்தி நடைபெறுவது ஒரு சிறப்பு நிகழ்வாக இருக்கும். இப்பழமைமிக்கக் கோவில்கள் திருவிழாக்காலங்களில் ஊரே தனிக்கலைகட்டிக் காட்சியளிக்கும். இவற்றுடன் ஊரெழு மேற்கில் காளி கோவில் மற்றும் பொக்கணை முருகன் கோவில் குலதெய்வ வழிபாட்டுக் கோவில்களாக விளங்குகின்றன.

பாடசாலைகள்:

இவ்வூர்மக்கள் இறைவன் மீதுகொ-ண்டுள்ள பக்திபோல் தம்சமுதாயத்திலும் மிகுந்த பற்றுக்கொண்டவர்கள். ஊரெழு மக்களின் கல்வி முன்னேற்றத்துக்கு ஆதாரமாக விளங்கிய பாடசாலைகள் பல. ஊரெழு சி.சி.த.க. பாடசாலை பாலர் கல்வியை வழங்கிய மூத்த கல்வி நிலையம் இன்று இல்லை. ஊரெழுக் கணேச வித்தயாசாலை இன்று மகாவித்தியாலய அந்தஸ்துடன் ஓங்கி வளர்கிறது. கல்லூரிகளான உரும்பிராய் இந்துக் கல்லூரி, ஸ்கந்தவரோதாயாக் கல்லூரி, சுன்னாகம் இராமநாதன் கல்லூரி, வசாவிளான் மத்திய மகாவித்தியாலயம் என்பன மேற்படிப்புக்கு உதவின. புலமைப் பரிசில் பெற்ற மாணவர்களை நகரப்பாடசாலைகள் ஈர்த்துக்-கொண்டன.

சங்கங்கள் கழகங்கள் :

இவ்வூர் மற்றும் மக்கள் நலன்கருதி
கிராம அபிவிருத்திச் சங்கம், மாதர் சங்கம்;, கூட்டுறவுச் சங்கம், பொலிஸ் பொதுமக்கள் நட்புறவுச் சங்கம் ஆகிய சங்கங்களும் இளைஞர் கழகம், ஊரெழுக் கம்பன் கழகம், ஊரெழு கல்வி கலாச்சார கழகம் ஆகிய கழகங்களும்; கலை, பண்பாட்டை வளர்க்கும் நோக்குடன் கலாமன்றமும் மற்றும் நூல் நிலையம், வாசிகசாலை என்பவற்றை உள்ளடக்கிய சனசமூக நிலையமும் இயங்கி வருகின்றன
இத்தகை அழகிய ஊரெழுக் கிராமம் இன்று போரால் உருக்குலைந்து காட்சியளிக்கின்றது. நாட்டுப்பற்றும், ஊர்ப்பற்றும் கொண்ட மக்கள் மறுபடியும் ஊரெழுவை மேம்படுத்தும் நோக்குடன் பல செயற்றிட்டங்களை முன்னெடுத்துச் செயற்படுத்தி வருகின்றனர். அச்செயற்பாடுகளுக்குப்; புலம்பெயர்ந்து வாழ்ந்தாலும் கனடா மண்ணில் வாழும் ஊரெழு மக்கள் “ஊரெழு ஒன்றியம்” என ஒரு சங்கத்தை உருவாக்கி அதன்மூலம் கைகொடுத்து வருகின்றனர். மானிடத்துக்கான சிக்கல்கள் எவ்வடிவிற் தோன்றிடினும் ஊராக எழுந்து நின்று தீர்வுகாணும் வெற்றியைப் பெற்ற ஊர் ஊரெழு என்ற எழுச்சிக் கருத்தும் ஊரின் பெயரோடு இணைந்திருப்பதாக உரைப்போரும் உளர். இக்கருத்துக்கு மேலும் உரம்சேர்க்கும் வகையில் இன்று உலகில் எத்திசையில் வாழ்ந்தாலும் ஊரெழுவார் உணர்வோடு தம் ஊருக்காகக் கைகோர்த்து நிற்கும் காட்சி அமைந்துள்ளது.
தகவல்:
1. வைத்திலிங்கம் தனீஸ்வரன், “ஊரெழு ஓர் அழகிய கிராமம்” உதயன் பத்திகை, நாள் மாதம் 2003, பக்கம் 21

2. ஞ. து. ஜெகதீஸ்வரன்

3. பத்மநாதன் பஞ்சலிங்கம்

 

 

Leave a Reply

Your email address will not be published. Required fields are marked *